EFE •  Redacción •  Galicia •  24/09/2019

Esquerda Unida denuncia a pasividade da Xunta de Galicia ante a trata e a explotación de mulleres e menores nos casos relacionados coa Operación Carioca

A Xunta segue sen dar resposta á denuncia interposta por Esquerda Unida na Fiscalía na que se solicitaba a implicación desta e do Concello de Lugo para presentarse como acusación.

Esquerda Unida denuncia a pasividade da Xunta de Galicia ante a trata e a explotación de mulleres e menores nos casos relacionados coa Operación Carioca

Hoxe, no Día Internacional contra a Explotación Sexual e Trata de Persoas, lembramos que a Xunta de Galicia segue a ser cómplice de impunidade nos casos relacionados coa Operación Carioca, xa que segue sen dar resposta á denuncia interposta por Esquerda Unida na Fiscalía na que se solicitaba a implicación desta e do Concello de Lugo para presentarse como acusación e que exerceran, dunha vez por todas, as súas responsabilidades como administracións públicas.

Raquel Bernárdez, coordinadora da área da Muller de Esquerda Unida, lembrou que hoxe se conmemora un ano máis o Día Internacional contra a Explotación Sexual e a Trata de Persoas, polo que temos que lembrar que a Xunta está a ser cómplice da impunidade nos casos relacionados coa Carioca e, se non se actúa, decenas de mulleres quedarán en vulnerabilidade en casos terribles, incluíndo a prostitución de menores. Bernárdez lembra que no mundo 40 millóns de persoas son vítimas de explotación sexual e, “máis do 70% son mulleres e nenas que proceden dos grupos máis vulnerables da sociedade, especialmente mulleres migrantes en situación administrativa irregular”, un colectivo que en Galicia representa o 90% dos casos detectados.

“España segue a aparecer como un dos principais destinos de mulleres e nenas vítimas de trata cun moi preocupante incremento de homes prostituídores, cada vez máis novos, que se sitúan entorno aos 20 anos”, sinala Bernardez que lembra que, aínda que pareza lonxano, “ao lado da casa temos clubes onde milleiros de mulleres son prostituídas e en Galicia temos tamén a maior causa xudicial contra o proxenetismo en España, coa Operación Carioca en Lugo, na que a Fiscalía non deu resposta”.

Dende Esquerda Unida recalcamos a noso posicionamento a favor das teses abolicionistas, defendidas polo movemento feminista, que sitúa a prostitución como unha forma de violencia machista extrema.


crimen organizado /  Galicia /  prostitución /