Comunicado de apoio ao peche na Facultade de Historia da Universidade de Santiago de Compostela (USC) en apoio ao pobo palestino

Desde os colectivos que formamos parte de Compostela por Palestina mostramos todo o noso apoio e recoñecemento para todas as persoas que están pechadas dentro da Facultade de Historia da Universidade de Santiago de Compostela, que teñen como único obxectivo defender os Dereitos Humanos e parar o xenocidio levado a cabo na actualidade polo Goberno de Israel contra a poboación Palestina.

Queremos denunciar o trato inxusto e difamatorio que o alumnado está sufrindo por parte de determinados medios de comunicación e tamén por determinados sectores da propia Universidade. Por todo isto, gustaríanos aclarar varios puntos:

− O estudantado en todo momento cumpriu coa normativa, mantendo un peche organizado que está incluíndo xornadas formativas con conferencias, actos simbólicos e reinvindicativos e tamén un organigrama de autoxestión que inclue limpeza, e mantemento da orde.

− O alumnado está levando a cabo as solicitudes internas de trámites para que as súas reivindicacións se debatan e voten nos organismos democráticos da propia USC, pero pese a ter as sinaturas necesarias, a súa proposta de inclusión das súas demandas sobre o tema de Palestina non foi incluída na Orde do Día do Consello de Goberno sen ningún tipo de xustificación, incumprindo así o propio regulamento interno da USC, violando os seus dereitos e impedindo que este tema poida tratarse pola vía .

− En todo momento mantívose aviso da ocupación de aulas e coordinación co Decanato da Facultade para a cesión das aulas ocupadas, e sempre houbo compromiso por parte do alumnado de non dificultar nin boicotear os exames. Tendo a USC cincuenta aulas na zona vella, a realización dos exames con normalidade é máis que viable.

− A recente problemática que xurdiu pola necesidade de baleirar de libros a biblioteca, (debido ao exceso de peso do material almacenado que provoca afundimento do chan da mesma, algo que non ten nada que ver co peche estudiantil), non foi notificado a asemblea de estudantes que se enteraron pola prensa,. O estudantado afirma que o proceso de traslado pode realizarse sen ningún tipo de incompatibilidade co peche, pois desde o primeiro momento houbo un compromiso de non interferir nos espazos non ocupados. O edificio ten espazos abondo e ascensores que permitirán que a empresa faga o seu traballo con total normalidade.

− As universidades están xogando un papel de total inacción e complicidade co proceso xenocida. Neste caso, a USC, financiada por un Goberno que está tolerando o xenocidio palestino, é outra máis das cómplices deste proceso. Por máis que faga declaracións institucionais propias e insuficientes ou a través do brando organismo da CRUE, hai numerosos feitos que demostran o contrario: non só a persistencia nas relacións académicas con universidades israelís (agora mesmo, por exemplo, con 13 proxectos de investigación en activo), senón a existencia de liñas de financiamento e contratación específicas ou a concesión de premios honoríficos a personalidades sionistas como Martha Nussbaum.

Por todo isto e ante a falta de vontade desta e doutras institucións de facer todo o posible para presionar a Israel para que pare na súa ofensiva xenocida, desde os colectivos de Compostela por Palestina apoiamos o peche e pedimos á sociedade xeral que apoie ao estudiantado e as súas mobilizacións.

Tamén esiximos a La Voz de Galicia que corrixa o artigo emitido e se retracte das falsas informacións sobre o Peche do alumnado na Facultade de Historia e se desculpe publicamente.

LISTA DE COLECTIVOS DE COMPOSTELA POR PALESTINA ASINANTES:
-Foro Galego de Inmigración
-Encontro Galego contra a OTAN
-BDS Compostela
-Tamborililás Compostela – Batukada Transfeminista
-SUGxPalestina
-Mocidade pola Independência

OUTROS COLECTIVOS ASINANTES:
-Rompanfilas
-Anticapitalistas
-Plataforma Galega pola Terceira República
-Ecoloxistas en acción