Ana Pontón: “As industrias como Inditex e Citroën deben tributar en Galiza”

A candidata do BNG á Presidencia da Xunta, Ana Pontón afirmou hoxe, no transcurso dun reparto electoral nas inmediacións da factoría  Citroën, que “as industrias que producen en Galiza, como Inditex e Citroën, deben tributar en Galiza”.

Nós, explicou  a candidata nacionalista, “queremos unha facenda galega para que empresas como Inditex ou Citroën tributen no noso país e utilicemos eses recursos para redistribuílos e seren útiles para blindar servizos públicos, crear emprego e mellorar as condicións de vida das galegas e galegos”.

Fronte ás instalacións de Citroën, Ana Pontón apostou polo apoio a sectores estratéxicos da nosa industria así como  “frear os procesos de deslocalización de empresas”. A automoción, é un sector “prioritario e estratéxico para Galiza” pero  nos últimos tempos, recalcou comprobamos que se está a producir unha deslocalización de empresas cara o norte de Portugal e  sen tecido industrial non “podemos producir riqueza e futuro no noso país”.

Nun dos corazóns industriais como é Vigo, a produción industrial galega saíu moi tocada da  crise e o balanzo de Núñez Feijóo nestes oito anos, dixo Pontón, pode verse retratado neses 30.000 empregos perdidos no sector industrial polo que candidata do BNG  apelou a un cambio  político o 25 de setembro  para “darlle a volta a esta situación”.

No acto tras o reparto electoral, Pontón rexeitou unha  reforma laboral que arrebatou  conquistas aos traballadores e traballadoras durante anos e nós, remarcou, “queremos deixar atrás a Galiza precaria e apostar pola Galiza que crea emprego e traballo digno”. O modelo de precariedade é insostible e xera desigualdade e pobreza no noso país. Neste sentido, anunciou que o BNG defende “que todas as persoas menores de 25 anos reciban unha oferta de emprego, formación continúa ou prácticas nos primeiros catro meses tras quedar no desemprego”.

A Xunta debe rescindir os contratos coas empresas que non respecten a igualdade laboral

Ana Pontón comprometeuse a  “non financiar a precariedade” polo que a Administración pública, dixo,  debe “rescindir os contratos da Xunta coas empresas que non cumpran coa igualdade salarial e incluír nos pregos de contratación garantías laborais e límites a subcontratacións e empresas de traballo temporal”.

Finalmente, a candidata do BNG acusou a Feijóo de ser “cómplice das políticas de precariedade” impulsadas pola reforma laboral.