Esquerda Unida recorda que detrás de cada feminicidio hai un sistema patriarcal e chama á participación nas concentracións contra a violencia machista do martes 20D
Dende Esquerda Unida temos que manifestar, unha vez máis, a nosa condena máis rotunda á violencia machista que cobrouse esta fin de semana dúas vítimas en Galicia, unha en Compostela e outra en Vigo. Neste senso, Eva Solla, membro da dirección de Esquerda Unida e vicepresidenta segunda do Parlamento por En Marea, traslada a súa solidariedade coas familias e amizades da vítima, á vez que recorda que “dende os poderes públicos se ten que loitar de forma prioritaria e de maneira real coa violencia machista que, en pleno século XXI, segue a ser usada como mecanismo de control e dominación da muller”.
![Esquerda Unida recorda que detrás de cada feminicidio hai un sistema patriarcal e chama á participación nas concentracións contra a violencia machista do martes 20D](https://www.tercerainformacion.es/wp-content/uploads/2016/12/cartel_3-950x0-c-default.jpg)
As vítimas mortais de agresións de xénero son só a parte visible dunha problemática con raíces moi fondas e “detrás de cada feminicidio hai todo un sistema patriarcal”. “Piropos, cousificación, medo a transitar soas pola rúa, fenda salarial, fenda das pensións, feminización da pobreza, colexios que segregan por xénero, ausencia de educación afectivo-sexual, sesgo de xénero na atención sanitaria e na investigación: «ti non sabes diso«, ser xulgadas polo aspecto e pola idade na política, no sindicalismo e no traballo… son exemplo de actitudes que impregnan as nosas vidas e as que temos que erradicar para acadar unha sociedade de igualdade real, destinando así esforzos e orzamentos suficientes”, explica Solla.
Para Esquerda Unida o feminismo é imprescindible e representa unha alternativa política global e integradora nun modelo de sociedade pola que traballamos: respectuosa, xusta e igualitaria.
É por iso que facemos un chamamento á participación nas concentracións convocadas contra a violencia machista para este martes, ás oito da tarde, nas seguintes localizacións:
-A Coruña, ás 20:00 no Obelisco.
-Santiago de Compostela, ás 20:00 na Praza 8 de Marzo.
-Ferrol, ás 20:00 diante da Casa do Concello.
-Vigo, ás 20:00 no Marco.
-Lugo, ás 20.00 diante do Concello.
-Ourense, ás 20:00 na Castañeira.
-Pontevedra, ás 20:00 na Audiencia Provincial.
-Vilagarcía, ás 20:00 na Praza de Galicia.