Un 80% das novas afiliacións á Seguridade Social en maio en Galiza foron con contrato fixo descontinuo ou temporal

O mercado laboral galego continúa a amosar unha tendencia moi negativa no que ten que ver coa calidade e estabilidade do emprego, até o punto de que case o 80% das novas afiliacións á Seguridade Social rexistradas no mes de maio foron mediante contratos fixos descontinuos ou temporais. Ademais, o descenso do desemprego rexistrado neste período produciuse case exclusivamente no sector servizos, polo que a temporalidade, a parcialidade e os baixos salarios continúan a medrar.

A nivel laboral o mes de maio adoita caracterizarse polo descenso das persoas en situación de desemprego e polo aumento da afiliación á Seguridade Social (SS). E este ano no foi unha excepción: a afiliación á SS medrou un 0,8% en Galiza, mentres que o descenso das persoas en desemprego foi do 3,4%. 

Fonte:  Elaboración propia a partir dos datos da SEPE.

Fonte: Elaboración propia a partir dos datos da SS.

Mais esta baixada do paro rexistrouse case exclusivamente no sector servizos, cun 76%. Un sector moi ligado ao turismo, no que o peso da temporalidade na contratación e os baixos salarios é a tónica predominante.

Fonte: Elaboración propia a partir dos datos da SEPE.

En canto ás novas afiliacións á SS, o 78,2% foi a través dun contrato fixo descontinuo ou temporal. De feito, neste último mes o que máis aumentaron foron os contratos temporais.

Fonte: Elaboración propia a partir dos datos da SS.

No que atinxe ao sexo das persoas que saíron do desemprego, os homes foron os máis beneficiados, xa que entre eles descendeu o desemprego un 4,1%, fronte ao 2,9% entre as mulleres. O 58% das persoas en desemprego son mulleres.

Por idades, vemos como a maior idade, menor descenso porcentual de desempregados e desempregadas. No mes de maio, o 61,7% das persoas que continúan en desemprego teñen máis de 45 anos.

Baixa calidade do emprego e extensión da pobreza laboral

O secretario confederal de Negociación Colectiva, Emprego e Industria da CIG, Paco Sío, considera que a pesar dos datos que amosan un descenso do paro en Galiza e da propaganda do Goberno central “na central sindical vemos con preocupación a evolución do mundo do traballo polo tipo de emprego que se está a crear e polas condicións nas que acceden as persoas traballadoras ao mercado laboral”. 

Sío lembra que o Estado español, cun 11% da poboación, ten máis do 25% do paro da ‘zona euro’, e posúe o récord europeo tanto en paro como en paro xuvenil (28% do desemprego a nivel europeo).

En canto á evolución positiva dos datos xerais fai fincapé en que o que acontece no Estado Español e en Galiza non é un fenómeno exclusivo, xa que o mes pasado a UE tivo a taxa máis baixa de desemprego da serie histórica (6,4%). “O que si é unha característica propia é a baixa calidade do emprego que se crea e a extensión da pobreza laboral que se está a rexistrar”.

Até o punto de que case o 80% das novas afiliacións á Seguridade Social foron contratos temporais e fixos descontinuos. Ademais, a parcialidade é cada vez maior, tanto na contratación temporal como indefinida. “Isto provoca que haxa persoas traballadoras cada vez máis precarias aínda que teñan un emprego indefinido porque non ingresan o salario completo”.

O responsábel sindical tamén pon o acento no feito de que a baixada do paro mes a mes se produza no sector servizos, “en Galiza centrado no turismo ligado ao Camiño de Santiago, polo que vemos como a medida que vai desaparecendo a industria real no noso país vai medrando a mal chamada industria turística, con salarios baixos e peores condicións laborais”.