A Memoria non branquea fascistas e rexeita falar diante dunha corporación que branquea o discurso negacionista
- O Comité de Memoria Histórica da Comarca de Celanova denuncia com feito inaudito que o o goberno municipal de Celanova admitise a intervención dos ultradereitistas denominados abogados cristianos nunha institución democrática.
- O Comité de Memoria Histórica da Comarca de Celanova dá por rematada a vía municipal dada a negativa do goberno a levar a pleno o debate da moción para a eliminación do símbolo falanxista levantado en 1939 ao abeiro da Ley de Memoria de 2007.
![A Memoria non branquea fascistas e rexeita falar diante dunha corporación que branquea o discurso negacionista](https://www.tercerainformacion.es/wp-content/uploads/2021/04/corporacion-municipal-pleno-950x0-c-default.jpeg)
Celanova viviu onte no salón de plenos do Concello unha xornada negra para as aspiracións da memoria do país que apoia a eliminación do monumento fascista de exaltación do golpe de Estado, da guerra, a represión e o franquismo levantado en 1939 pola Bandera de Falange de Marruecos, despois dun verán sanguento na vila.
O alcalde, co apoio dos grupos que sustentan o goberno (Celanova Decide e o PSOE) decidiu dar a palabra no ‘escano cidadán’ a un representante do ultradereitista colectivo denominado Abogados Cristianos de España, branqueando o discurso de odio, neofascista e negacionista nun feito insólito nunha institución democrática do país.
Este Comité non ten noticia de ningunha corporación municipal galega, ningunha deputación nin o Parlamento galego que teña aberto a porta das institucións que representan a democracia e nos que se defenden e protexen os valores cívicos e democráticos.
O Comité considera esgotada a vía municipal despois de que o grupo do alcalde, Celanova Decide, se unise o PP para rexeitar o debate da moción rexistrada por este Comité na que se demandaba a aplicación da Ley de 2007 sobre o símbolo fascista que foi presentada con antelación a todos os grupos (agás o PP, que ignorou o convite). Un mes despois de presentada a moción, só o BNG asumiu o texto e a necesidade do debate, o PSOE esperou o pleno para apoiar que se debatese, pero o PP (6 concelleiros) e Celanova Decide (4) fixeron valer a súa maioría impedindo o debate.
O Partido Popular, por boca do seu portavoz, ex alcalde e na actualidade parlamentario, Xosé Luis Ferro, indicou que eles están a favor de eliminar símbolos fascistas pero que non están a favor de eliminar este porque non o consideran un símbolo fascista “e se están a atacar outras cousas”. Non dixo cales. O Comité lembra que durante os anos do goberno de Xosé Luis Ferro non se retirou ningún símbolo fascista en Celanova en cumprimento da Ley de 2007.
O pleno celebrouse con medidas moi restritivas impostas polo alcalde, cunha limitación de aforo que deixou público fóra. Ademais, desde minutos antes do comezo da sesión e durante toda a sesión fíxose visíbel na praza Maior e nas inmediacións un despregue da Guardia Civil inusitado, con até cinco parellas e vehículos policiais, ademais da Policía Local. O Comité descoñece a xustificación deste despregue policial e considérao un acto intimidatorio gratuíto.
Cando, rematado o pleno, chegou a quenda reservada o ‘escano cidadán’ na que o Comité tiña concedida a palabra, o Comité abandonou a sala. Saíu tamén o concelleiro do BNG. Ficaron dentro os representantes do PP, Celanova Decide e PSOE.