A Xunta de Persoal denuncia mala xestión e improvisación continua nas obras do “Novo CHUAC”

Critican que a recolocación destes profesionais non foi comunicada ao órgano de representación «coa antelación suficiente, sendo a información moi sesgada» e que a pesar de reclamalo en repetidas ocasións «as organizacións sindicais non recibiron a información, nin foron negociadas as condicións laborais deste persoal mobilizado».

A maior parte destes/as profesionais van a ser reubicados no edificio Expocoruña. Tras coñecer a decisión, a Xunta de Persoal solicitoulle á Xerencia unha reunión urxente, «que se convoca pasada unha semana da súa petición e no mesmo día que comeza o traslado de profesionais».

Neste contexto, as/os delegadas/os de prevención da área sanitaria de A Coruña- Cee esixiron que a Xerencia amosara as instalacións de Expocoruña, descubrindo «un claro déficit de espazo». «O número de persoas traballadoras é maior que os postos de traballo dispoñíbeis, que están amoreados en espazos abertos sen privacidade algunha ou en despachos minúsculos, non  cumprindo os mínimos necesarios para desenvolver o seu traballo diario», advirte a presidenta da Xunta, Lucía Peón. Así mesmo, esixironselle á Xerencia as avaliacións de risco destes espazos, «xa que as/os técnicas/os de prevención tampouco visitaran os locais».

Para o órgano de representación todo isto pon de manifesto «unha vez máis a falta de organización e previsión distintivas desta Xerencia, así coma unha nefasta xestión e mala utilización de recursos que está sendo xa habitual nas obras do Novo CHUAC».

 Dilixencias da Inspección de Traballo

No marco destas obras, xa se inauguraron dous «novos servizos» como son a UCI e a Farmacia, «ambos con dilixencias de Inspección de Traballo onde se constatan deficiencias importantes en canto aos espazos, riscos biolóxicos, etc.».

A modo de exemplo, explican que nos boxes da UCI no espazo que a Xerencia dispuxo para este fin non colle a aparataxe precisa para prestar a asistencia  necesaria, «nin as/os traballadoras/es poden moverse con facilidade para atender ás persoas doentes, é dicir, miles de euros invertidos en recursos sen planificación, sen ter en conta a participación dos/as profesionais e sen ser axeitados para unha prestación sanitaria en condicións adecuadas».

Por todo isto, a Xunta de Persoal acordou realizar esta primeira mobilización á que lle seguirán outras medidas de presión «se a Xerencia non rectifica e xestiona as obras adecuadamente».