Sindicatos do SERGAS concéntranse diante da consellaría en demanda do cumprimento do acordo das 35 horas

Delegadas e delegados das organizacións sindicais con representación na mesa sectorial de Sanidade concentráronse esta mañá para reclamar do SERGAS o cumprimento do acordo asinado o 20 de abril de 2023, polo que se establecía unha xornada de 35 horas para todo o persoal a partir do 1 de xaneiro deste ano e en demanda de que se presente unha proposta de regulación da voluntariedade, e non un documento pechado, para abordar unha verdadeira negociación

Un acordo que, segundo denunciou o secretario nacional de CIG-Saúde, Manuel G. Moreira,  se está incumprindo porque, “non pode haber persoal de primeira, ao que se lle aplique as 35 horas, e de segunda, ao que non se lle aplique”. A este respecto, lembrou que “era responsabilidade da Administración organizar os recursos humanos para que non haxa, en ningún caso, persoal que se vexa obrigado a facer as 35 horas”; que tiveron desde o 20 de abril de 2023 para facelo “e non o fixeron” e que este acordo “era para reducir xornada, non para que cobrásemos máis”.

O secretario nacional da CIG-Saúde apuntou que o SERGAS tiña que ter previsto contratar máis persoal naqueles casos nos que fose necesario e matizou que naquelas categorías profesionais e especialidades nas que haxa dificultades para contratar habería que buscar un sistema de organización “que en ningún caso obrigara a ninguén a facer máis as 35 horas. Un sistema de regulación da voluntariedade, como se ten feito en outros acordos e en ocasións anteriores”.

Moreira sinalou que esa regulación da voluntariedade atinxe fundamentalmente ao persoal facultativo de familia, para xornada de sábado, mais tamén a enfermería, en Atención Primaria, enfermería en Hospitalaria ou a persoal facultativo especialistas de determinadas especialidades no ámbito dos hospitais.

Para a CIG- Saúde nesa regulación ten que quedar claro que as 35 horas son a xornada ordinaria para todas as categorías profesionais e que, polo tanto debe eliminarse a obrigatoriedade da realización de xornadas por riba dese límite e debe definirse a prestación que se realiza nos sábados e que categorías teñen que realizalos.

O grupo de traballo ten que englobar a todo o persoal estatutario dos ámbitos de atención primaria, hospitalaria e entidades adscritas a Consellería de Sanidade e que teña en conta todas as categorías que se están vendo obrigadas actualmente á realización de sábados. E a negociación ten que iniciarse desde a supresión da obriga de facer sábados para todas as categorías profesionais.

Demanda de negociación

Con esta mobilización as organizacións sindicais demandaron tamén que esa regulación de voluntariedade sexa “coherente e transparente para o conxunto do sistema”. Por iso o secretario nacional de CIG-Saúde denunciou que, porén, “cada xerencia está facendo o que lle parece para dar cobertura existencial, cousas diferentes e mesmo contraditorias”.

Moreira incidiu na importancia dunha verdadeira negociación e “non, como fixo a consellaría, que nos trouxo un documento, só para Medicina de Familia, que ademais non responde as necesidades reais”. Un documento que cualificou como “simplificador”, porque “non contempla toda a realidade, non incentiva a voluntariedade e que van a utilizar como desculpa para, como non hai voluntariedade, xa ter carta branca para obrigar a superar as 35 horas”.

Ademais, fronte á afirmación do conselleiro de Sanidade, que considerou que con esta mobilización as organizacións sindicais demostraban que non querían negociar, o secretario nacional de CIG-Saúde afirmou que quen non quere negociar é a consellaría. “Presentounos un documento fechado, nun grupo de traballo no que non abriu ningunha negociación, para que o aprobáramos” e como se aprobou “deu por desconvocado ese grupo de traballo”.

De aí que as organizacións sindicais quedaran emprazadas para o vindeiro luns, para valorar a resposta ao SERGAS á súa petición dunha nova convocatoria do grupo de traballo e, en función diso, acordar novas accións porque “desde logo non imos ficar parados”.