Unidas Podemos denuncia a entrada de menores á capea de Padrón e recrimina a actitude do concello

A este evento taurino acudiron persoas menores de 12 anos de idade, o que contravén a Lei 10/2017, do 27 de decembro, de espectáculos públicos e actividades recreativas de Galicia. O secretario de Podemos Galicia de Benestar Animal, Rubén  Sueiras, denuncia que “o espectáculo taurino do pasado domingo foi a mellor demostración do esperpento, con menores de idade contemplando a humillación dos animais como algo divertido cando a súa presenza é ilegal”.

Numerosas fotografías publicadas polo concello de Padrón demóstrano. Galicia en Común preguntou ao Goberno se a Garda Civil, alí presente, levantou algunha acta de infracción ou se percatou da presenza de menores. O deputado da formación e tamén secretario xeral de Podemos Galicia, Antón Gómez Reino, critica que o Concello “promova” unha actividade pública deste tipo e que permita a entrada de menores ao recinto.

“A sociedade galega rexeita as corridas de touros. É algo do pasado, da época franquista, e é puro maltrato animal. Galicia non quere formar parte disto, e vímolo coa cantidade de firmas e a mobilización social nos días anteriores á corrida de touros de Padrón”, sinala Gómez Reino.

Pola súa banda, o secretario de Benestar Animal considera que “o alcalde debería dimitir por eludir a súa responsabilidade última de facer cumprir as leis no municipio”.