Máis de mil alegacións contra o proxecto de minaría a ceo aberto Novo Frixo, na Limia
- Rexistradas este luns 380 alegacións no último día do prazo de participación pública.
- A Plataforma comarcas Limia-Verín NON AS MINAS informa dunha cifra similar de alegacións contra cada un dos dous proxectos que afectan ao concello de Oímbra, e aos concellos de Verín e Vilardevós.
![Máis de mil alegacións contra o proxecto de minaría a ceo aberto Novo Frixo, na Limia](https://www.tercerainformacion.es/wp-content/uploads/2024/07/Mesa-recollida-de-alegacions-na-feira-de-Xinzo-o-13-de-xullo-950x0-c-default.jpeg)
STOP EÓLICOS A LIMIA XURÉS CELANOVA e o MOVEMENTO ECOLOXISTA DA LIMIA, en colaboración coa plataforma MINA NOVO FRIXO NON, conformada por veciñanza de Cualedro, Laza e Sarreaus, rexistrou este luns 380 alegacións contra os permisos de investigación ao proxecto Novo Frixo, de minaría a ceo aberto, que afecta a estes tres concellos limianos.
A plataforma MINA NOVO FRIXO indicou que terá rexistradas aproximadamente outras 700 alegacións ao proxecto durante o traballo de información á veciñanza realizado nas dúas últimas semanas na Limia.
O prazo de exposición pública nesta fase do procedemento rematou hoxe, e agora a Administración deberá atender e responder as alegacións presentadas pola veciñanza, concellos e outras entidades e colectivos ecoloxistas.
Tamén rematou o prazo para alegar contra os outros dous proxectos: Novo Cima, que afecta a Verín e Vilardevós, e Novo Arboim, que afecta a Oímbra. Desde a Plataforma comarcas Limia-Verín NON AS MINA, na que nos estamos a agrupar os diversos colectivos veciñais e ambientalistas, sinalan a cifra de 1.000 alegacións contra cada un destes proxectos. Polo que a resposta veciñal en apenas dúas semanas de campaña de información e recollida de alegacións ten sido notábel.
Xinzo de Limia, 22 de xullo de 2024.
![](https://www.tercerainformacion.es/wp-content/uploads/2024/07/Alegacions-no-Rexistro-da-Xunta-en-Ourense-este-luns.jpeg)