Xuventude polo Clima concéntrase en Vigo para pedir un cambio de modelo e “democratizar” a enerxía
Decenas de mozas concentráronse este venres en varias cidades galegas baixo a lema ‘Democratización da enerxía por un territorio autosuficiente‘ para esixir un cambio de modelo enerxético, que poña “no centro ás persoas” e promova as enerxías renovables “desde un punto de vista responsable”.
Así o trasladou o coordinador de Xuventude polo Clima-Fridays for Future, Xoán Torres, en declaracións aos medios durante a concentración celebrada na Praza do Rei, diante do Concello de Vigo.
Segundo apuntou, tras un verán “devastador” polos incendios e a seca, o Goberno de España mantén “políticas enerxéticas que non conveñen para o futuro” e instaron ao Executivo a retirarse do Tratado da Carta de Enerxía, “porque protexe infraestruturas de combustibles fósiles”, como o gas; ou que se paralice o gasoduto MidCat.
Xoán Torres subliñou que “hai que apostar por infraestruturas de enerxía renovable” como as placas solares para autoconsumo, “pero con responsabilidade, non para facer macroparques eólicos en zonas protexidas”. “Esiximos ás administracións que invistan en enerxías renovables”, proclamou, á vez que lembrado que a actual crise “social, económica e enerxética, “como todas as crises”, afecta máis as persoas empobrecidas, que son as que sofren principalmente os efectos do cambio climático.
No caso de Vigo, lamentou que, a pesar de que o Concello asinou a Declaración de Emerxencia Climática, “serviu para practicamente nada”, xa que “non cumpriu nin unha das promesas que fixo”. “Ao contrario, invisten en cousas que non axudan”, concluíu.
Relacionado
